സ്വർണവില 2026 ഡിസംബറില്‍ എത്രയാകും? പ്രവചനവുമായി ഗോള്‍ഡ്മാന്‍; ക്രൂഡ് ഓയില്‍ വില 60 ഡോളറിന് താഴേക്ക്

വരും വർഷവും സ്വർണ വിലയില്‍ മുന്നേറ്റം പ്രവചിച്ച് ഗോൾഡ്മാൻ സാക്സ്. 2026 ഡിസംബറോടെ സ്വർണവില 14 ശതമാനം ഉയർന്ന് ഒരു ഔൺസിന് 4900 ഡോളറിലെത്തുമെന്നാണ് പ്രവചനം. സ്വകാര്യ നിക്ഷേപകരിലേക്ക് വൈവിധ്യവൽക്കരണം വ്യാപിക്കുന്നത് മൂലം ഇതിനേക്കാൾ ഉയർന്ന വിലയ്ക്ക് സാധ്യതയുണ്ടെന്നും വ്യാഴാഴ്ച പുറത്തിറക്കിയ റിപ്പോർട്ടില്‍ ബാങ്ക് ചൂണ്ടിക്കാട്ടുന്നു. 2026ലെ ചരക്കുവിപണി പ്രവചനങ്ങൾ ചർച്ച ചെയ്യുന്ന റിപ്പോർട്ടിൽ, കേന്ദ്രബാങ്കുകളുടെ ഭാഗത്ത് നിന്നുമുണ്ടാകുന്ന ഉയർന്ന ആവശ്യകത, യുഎസ് ഫെഡറൽ റിസർവിന്റെ പലിശനിരക്ക് തുടങ്ങിയവയും സ്വർണവില ഉയർത്തിയേക്കുമെന്നും ഗോൾഡ്മാൻ സാക്സ് പറയുന്നു.

സ്വർണത്തിൽ ദീർഘകാല നിക്ഷേപം തുടരാനും ബാങ്ക് ശുപാർശ ചെയ്യുന്നു. ഇന്ന് അന്താരാഷ്ട്ര വിപണയില്‍ ഏകദേശം 4340 ഡോളർ എന്ന നിലവാരത്തിലാണ് സ്വർണ വില്‍പ്പന നടക്കുന്നത്. വില 4900 ത്തിലേക്ക് എത്തുകയാണെങ്കില്‍ നിലവിലെ വിനിമയ നിരക്ക് അനുസരിച്ച് പവന് ഏകദേശം 1.15 ലക്ഷത്തോളം രൂപ നല്‍കേണ്ടി. ഡോളറുമായുള്ള രൂപയുടെ വിനിമയ നിരക്ക് ഇടിയുകയാണെങ്കില്‍ ഈ നിരക്കില്‍ നിന്നും വില വീണ്ടും മുകളിലേക്ക് ഉയരും.

ചെമ്പിന്റെ വില 2026ൽ ഏകീകരിക്കപ്പെട്ടേക്കാമെന്നും മെട്രിക് ടണ്ണിന് ശരാശരി 11,400 ഡോളർ എന്നതായിരിക്കാമെന്നും ബാങ്ക് പ്രവചിക്കുന്നു. താരിഫ് അനിശ്ചിതത്വം 2026 മധ്യത്തോടെ തുടരുമെന്ന അടിസ്ഥാനത്തിലാണ് ഈ കണക്ക്. 2027ൽ റിഫൈൻഡ് ചെമ്പിന് യുഎസ് താരിഫുകൾ ഏർപ്പെടുത്തിയേക്കാമെന്ന പ്രഖ്യാപനം വരെ ഇത് നീളുമെന്നാണ് കണക്കാക്കുന്നത്.

"ചെമ്പിന്റെ സമീപകാല റാലിക്ക് ശേഷം 2026ൽ ഏകീകരണം പ്രതീക്ഷിക്കുന്നുണ്ടെങ്കിലും, ദീർഘകാലത്തേക്ക് ഇത് ഞങ്ങളുടെ 'പ്രിയപ്പെട്ട' വ്യാവസായിക ലോഹമാണ്. ശക്തമായ ഡിമാന്‍ഡും വിതരണത്തിലെ നിയന്ത്രണങ്ങളും ഇതിന് കാരണമാകും," ഗോൾഡ്മാൻ സാക്സ് കുറിച്ചു.ബ്രന്റ്, ഡബ്ല്യുടിഐ ക്രൂഡ് ഓയിൽ വിലകൾ 2026ൽ കൂടുതൽ ഇടിഞ്ഞ് യഥാക്രമം ശരാശരി 56 ഡോളറും 52 ഡോളറുമായിരിക്കുമെന്നും ബാങ്ക് പ്രവചിക്കുന്നു. "വലിയ വിതരണ തടസ്സങ്ങളോ ഒപെക് ഉൽപ്പാദന കുറവുകളോ ഇല്ലെങ്കിൽ, 2026ന് ശേഷം വിപണി പുനഃസന്തുലിതമാക്കാൻ 2026ൽ എണ്ണവില കുറയേണ്ടി വരും," റിപ്പോർട്ട് കൂട്ടിച്ചേർത്തു.

2026 മധ്യത്തോടെ വിപണി പുനഃസന്തുലിതാവസ്ഥ പ്രതീക്ഷിക്കുന്നതോടെ എണ്ണവില ഏറ്റവും താഴ്ന്ന നിലയിലെത്തുമെന്ന് ഗോൾഡ്മാൻ പ്രവചിക്കുന്നു. ദിവസേന 1.2 മില്യൺ ബാരൽ ആവശ്യകത വളർച്ച, യുക്രെയ്ൻ യുദ്ധവും നിയന്ത്രണങ്ങളും തുടരുന്ന പശ്ചാത്തലത്തിൽ റഷ്യൻ വിതരണത്തിലെ കുറവ്, റഷ്യയ്ക്ക് പുറത്തുള്ള നോൺ-ഒപെക് ഉൽപ്പാദനത്തിന്റെ മന്ദഗതി എന്നിവയാകും ഇതിന് കാരണം.

എന്നാൽ, 2027 രണ്ടാം പകുതിയിൽ വിപണി വീണ്ടും ഡെഫിസിറ്റിലേക്ക് മടങ്ങുന്നതിന്റെ പ്രൈസിങ് ആരംഭിക്കുന്നതോടെ അടുത്ത വർഷത്തെ നാലാം പാദത്തിൽ എണ്ണവില ഉയരുമെന്നും ബാങ്ക് കരുതുന്നു. 2028 അവസാനത്തോടെ ബ്രന്റും ഡബ്ല്യുടിഐയും യഥാക്രമം 80 ഡോളറും 76 ഡോളറുമായി തിരിച്ചെത്തുമെന്നാണ് പ്രതീക്ഷ. പ്രകൃതിവാതകത്തിന്, 2026ൽ യൂറോപ്യൻ ടൈറ്റിൽ ട്രാൻസ്ഫർ ഫെസിലിറ്റി (TTF) 29 യൂറോ പ്രതി മെഗാവാട്ട്-അവറും 2027ൽ 20 യൂറോയുമായിരിക്കുമെന്ന് പ്രവചനം. യു.എസ് വാതകവില 2026ൽ 4.60 ഡോളറും 2027ൽ 3.80 ഡോളറുമായി ഉൽപ്പാദന വളർച്ചയെ പ്രോത്സാഹിപ്പിക്കും.

Content Highlights: Gold rate: What It Could Be In December 2026 As Predicted By Goldman, As crude Rates Fall Below 60 Dollar